(အယ်ဒီတာ အာဘော်)
ရည်ရွယ်ချက်အတိုင်း ကျင့်ကြံဆောင်ရွက်နိုင်ကြပါစေ
ကျွန်ုပ်တို့သည် ကျွန်စနစ် (၅)ထပ်ကွင်း ညှင်းပမ်းမှု အမျိုးမျိုးအောက်တွင် နှစ်ပေါင်း (၂၂၇)သို့ ချီတက်လာနေပြီး ဖြစ်ပါသည်။ တခုနှင့် တခုအကြား မည်သည့်လောက် ဝေးကွာသည်ဖြစ်စေကာမူ အားလုံးသည် ဆက်စပ်မှုရှိနေကြသည်ကို လူတိုင်းခေတ်နှင့်အညီ မြင်နိုင်စွမ်း ရှိကြသည့် အမြင်အမြော်ရှိသော ခေတ်ကိုလည်း တက်လှမ်းလာပြီး ဖြစ်သည်။ ကျွန်ုပ်တို့၏ အတတ်-အသိပညာပိုင်းဆိုင်ရာ ကဏ္ဍများ မှာလည်း ဘက်ပေါင်းစုံနိုင်အောင်အထိ တည်ဆောက်နိုင်ကြသည့် ကာလကို ဖန်တီးနိုင်ကြသော အချိန်အခါလည်း တိုင်ပြီဖြစ်ပါသည်။
စစ်အုပ်စုနှင့် ၎င်းအပေါင်းအပါတို့၏ စစ်အာဏာရှင်စနစ် တည်ငြိမ်ရေး စီမံကိန်း ကျားကွက်များကိုပင် ထိုးထွင်းသိမြင်သည့် စွမ်းအင် များလည်း တပ်ဆင်ရရှိပြီးသား ကာလသို့ တက်လှမ်းရောက်ရှိနေကြပြီး ဖြစ်ပါသည်။ ယင်းတို့ကျားကွက်များ စီမံမှုမပြုလုပ်ခင်ကတည်း က မိမိတို့ကျားကွက်များကို ကင်းချထားပြီးအနေအထား ဖြစ်နေပြီမို့ မိမိတို့ အမျိုးသားအကျိုးစီးပွားနှင့် ဘက်စုံလုံခြုံရေး ၀ါဒ လှုပ်ရှားမှုမှာ ပကတိ လုပ်ဆောင်ကျင့်ကြံမှုများ အဓိကကျနေပါသည်။
ကျွန်ုပ်တို့၏ ရည်ရွယ်ချက်ပန်းတိုင်ကို မြေကြီးလက်ခတ်မလွဲ ရောက်လှမ်းနိုင်ဖို့အတွက် ပကတိအတိုင်း လိုက်နာဆောင်ရွက် ကျင့်သုံး ကြမည်ဆိုပါလျှင် စီမံကိန်းအတိုင်း အောင်မြင်နိုင်မည်မှာ သေချာပေသည်။ မအောင်မြင်သေးသည့် အချိန်ကာလအတိုးအတွင်းတွင် ရည်ရွယ်ချက် မပျောက်ကွယ်ဖို့၊ ရေကြိုင်ရာ မြက်နုရာနှင့် မွေ့မပျော်တတ်ခြင်းပင် ပန်းတိုင်ကို ဆုတ်ကိုင်လျှက်နှင့် ရန်သူကိုတော်လှန် နေဆဲဖြစ်သည်ကို ခံယူတတ်ကြရမည် ဖြစ်ပါသည်။ ကျွန်ုပ်တို့ အရှိကိုအရှိအတိုင်း သိမြင်လျှက် ကျင့်ကြံတတ်ဖို့ အရေးကြီးပါသည်။
မည်သည့် အခန်းကဏ္ဍတွင်မဆို ကောင်းကျိုးဖြစ်စေ၊ ဆိုးကျိုးများဖြစ်စေ တန်ပြန်မှု ရှိသည်။ ကျွန်ုပ်တို့ အထူးသတိထားကြရမည်မှာ ပျက်ပြားသွားခဲ့သည့် ယုံကြည်မှုကို နဂိုအတိုင်း ပြန်လည်ကာ လုံးဝတည်ဆောက်၍ မရပေ။ ကျွန်ုပ်တို့၏ အဓိကဂုဏ်မှာ အမျိုးသား အကျိုးစီးပွား လုံခြုံရေးနှင့် ဆက်စပ်သည့် အရာမှန်သမျှ လုံခြုံမှုအပြည့်အ၀ ရှိစေရေးပင် ဖြစ်ပါသည်။
မိမိတို့၏ မဟာဗျူဟာမြောက် တိုက်ပွဲသဏ္ဍာန်သည် ရန်သူနယ်ချဲ့သမားများကို တရားသော တိုက်ခိုက်မှုဖြင့် မိမိတို့နယ်မြေမှ အလျှင်အမြန် ခြေမှုန်းမောင်းထုတ်ရေး ၀ါဒဖြစ်သည်။ မိမိတို့အကြား ပဋိပက္ခများသည် ရန်သူကျော့ကွင်းထဲ ခုန်ဆင်းသကဲ့သို့ ဖြေရှင်း သည့်နည်းလမ်းများ မဟုတ်ဘဲ ပဋိပက္ခမှန်သမျှမှာ ရန်သူထောင်ချောက်သာဖြစ်ကြောင်း လက်ခံယုံကြည်ဖို့ လိုအပ်ပါသည်။ ထို့တွက် မိမိတို့ လုပ်လာနိုင်သမျှ၊ ဆက်စပ်သမျှ လှုပ်ရှားမှုတို့သည် ရန်သူကိုဦးတည်သည့် တိုက်ကွက်များဖြစ်ရန် ကျင့်သုံးတတ်ရမည်ဖြစ်ပါသည်။
သို့ဖြစ်ပါ၍ ကျွန်ုပ်တို့သည် မည်သည့်အလုပ်၊ မည်သည့်နေရာ၊ မည်သည့်အချိန်ကာလအနေအထား၊ မည်သည့်အခြေ အနေမျိုးပင် ရောက်ရှိနေစဉ်ကာမူ စာတလုံး၊ စကားတခွန်း၊ သခြင်းတပုဒ်၊ ခြေတလှမ်း၊ လုပ်ငန်း ကဏ္ဍတခုခုတိုင်းစီတွင် တဆင့်စီ အမျိုးသား အကျိုးစီးပွား လုံခြုံရေးအတွက် ဇောင်းပေးပြီး ရည်ရွယ်ချက် မှန်ကန်စွာ လုပ်ဆောင်ကြရန် အရေးကြီးနေပေသည်။
ထို့ကြောင့် မကြာမနှောင်းအချိန်တိုအတွင်း အမျိုးသားအကျိုးစီးပွားများ လုံခြုံရေးနှင့် ပတ်သက်၍ မြေပေါ်မြေအောက်၊ ရေပေါ်ရေ အောက်အပြင် မျိုးဆက်သစ် လူကောင်းလူတော် အရင်းအမြစ်များကို ပိုမိုထိမ်းသိမ်း၊ မွေးမြူကာကွယ်စောင့်ရှောက်နိုင်အောင် အဓိက အခန်းကဏ္ဍတွင် အမျိုးသမီးများ၊ မပါဝင်သေးသော မိတ်ဆွေသဟာယများ၊ နီးစပ်သည့် မျိုးချစ်ပြည်ချစ်များအပြင် မိမိတို့၏ သားသမီး များ အပါအ၀င် ဘက်စုံဖက်မှ ရည်ရွယ်ချက်အတိုင်း ကျင့်ကြံဆောင်ရွက်နိုင်ကြစေဖို့အရေး စစ်မှန်သောအမျိုးသားရေးဝါဒ တာဝန် ကိုယ်စီကို ယူကြရန် နှိုးဆော်တိုက်တွန်းစည်းရုံး ပူးပေါင်းလုပ်ဆောင်ကြဖို့ ပန်ကြားလိုက်ရပါသည်။
No comments:
Post a Comment