စစ်တွေ ရခိုင်ရိုးမ June 20, 2011
စစ်တွေမြို့မှာ ရီနက်ဆိပ်ကမ်းအတွက် တည်ဆောက်ဆဲကာလဖြစ်တေ ရီနက်ဆိပ်ကမ်းဖို့မြီတိရေ ဒေလ ၁၇-ရက်နိက မိုးကြီးခရေအတွက် ဖို့မြီတိပျက်စီးလားကြောင်း စစ်တွေကလာရေ သတင်းတရပ်အရ သိရပါရေ။
၂၀၁၁ ခုနှစ်ကစပြီးကေ စစ်တွေဆိပ်ကမ်းအတွက် မြန်မာဆိပ်ကမ်းအာဏာပိုင်ရုံး အနီးတ၀ိုက်မှာရှိရေ သောင်ပြင်တိကို သဲ တိနန့် ဖို့ထားခြင်းဖြစ်ပြီးကေ မိုးများရေအတွက် ဖို့ထားရေ သဲသောင်တိ ပျက်စီးလားစွာဖြစ်တေလို့ သိရပါရေ။
“မိုးကြီးလို့ ဆိပ်ကမ်းအတွက် ဖို့ထားရေသဲမြီတိ ပျက်စီးလားစွာပါ၊ လုပ်ငန်းကတော့ခါ မိုးတွင်းဆိုခါ ရပ်နားထားပါရေ၊ မိုးကုန်မှ လုပ်ဖို့ထင်ရေ၊ ပျက်စီးလားရေ ဆိပ်ကမ်း၏ ဖို့မြီတိကိုလည်း ပြန်ပနာလုပ်ရဖို့ အနီအထားရှိရေ၊ ခုကတခုလဲမကျန်လိုက်ဗျာ၊ ရီတိုက်စားလို့ “ ဟု စစ်တွေမြို့ခံတစ်ယောက်က ပြောပါရေ။
လုပ်ငန်းအစဦးကာလဖြစ်တေ သောင်ပြင်ကမ်းခြီကို အမာခဲအဖြစ် သဲတိနန့်ဆယ်ဖို့နီစွာဖြစ်ပြီးကေ ခိုင်ခန့်မှု မရှိသိမ့်ရေ အတွက် အခုပိုင်ပျက်စီးလားခြင်းဖြစ်ကြောင်း သူကပြောပါရေ။ အဂုခါရေ မိုးတွင်းကာလ ရောက်လာရေအတွက် လုပ်ငန်းတိကို ရပ်ဆိုင်းထားကြောင်း သိရပါရေ။
ဆိပ်ကမ်းအတွက် ဆည်ဖို့ရန်သဲတိကို ပွိုင့်ကမ်းခြီက တူးဖော်မှု တိရှိရေခါ ပြည်သူတိကကန့်ကွက်ခလို့ ပွိုင့်နန့် အနောက်ဘက်၂မိုင်ကျော်ရှိရေ ရီချိုးဆိပ်ကနီ သဲတိတူးဖော်ပနာ ဆိပ်ကမ်းအတွက် အသုံးပြုနိန်ရကြောင်းသိရပါရေ။
စစ်တွေဆိပ်ကမ်းကို လွန်ခရေ နှစ်အနည်းငယ်ကစပြီးကေ အိန္ဒိယနိုင်ငံ ESSAR ကုမ္ပဏီက ဆောက်လုပ်ရေး လုပ်ငန်းကို တာဝန်ယူထားစွာဖြစ်ပြီးကေ အဆိုပါဆိပ်ကမ်းရေ ရခိုင်ပြည်နယ်မှာ နိုင်ငံတကားရင်းနှီးမြုပ်မှု ဒုတိယ စီမံကိန်းဖြစ်ပြီး အိန္ဒိယ အရှေ့တောင်အာရှဆိုင်ရာ ကုန်သွယ်မှုအတွက် အိန္ဒိယနိုင်ငံ၏ ခြီလှမ်းသစ်တရပ် ဖြစ်ပါရေ။
၂၀၀၉ခုနှစ် ဧပြီလက အိန္ဒိယနိုင်ငံ နယူးဒေလီမြို့မှာ မြန်မာနိုင်ငံက တာဝန်ရှိသူရို့ သဘောတူလက်မှတ်ရွီးထိုးခရေ ရင်းနှီးမြုပ်နှံမှု ကန်ဒေါ်လာသန်း၁၂၀ဖို့ရှိပြီးကေ အဆိုပါဆိပ်ကမ်းရေ အိန္ဒိယနိုင်ငံအရှေ့မြောက်ပြည်နယ်တိကနိန် ကုလားတန်မြစ်ကြောင်း ကုန်သွယ်ရေးတိကို ဆောင်ရွက်လားဖို့ဖြစ်ကြောင်း သိရပါရေ။
သို့သော် စီမံကိန်းအတွက် ကုလားတန်မြစ်ကြောင်းတလျှောက်ရှိ ကျေးရွာတချိူ့ပြောင်းရွိ့ရဖို့ အနီအထားမှာ ရှိရေအတွက် စိုးရိမ်မှုတိရှိနိန်ကတ်ကြောင်း သိရပါရေ။
http://www.rakhaingroma.com/News/inter-news/06-2011/20-06-2011.html
No comments:
Post a Comment