Thursday, June 16, 2011

တရုတ်ကြားဝင် ညှိပေးရန် KIA လိုလား

တရုတ်ကြားဝင် ညှိပေးရန် KIA လိုလား
သန်းထိုက်ဦး Thursday, 16 June 2011 19:14

ကချင်ပြည်နယ်တွင် အစိုးရတပ်များနှင့် ဖြစ်ပွားနေသော တိုက်ပွဲများနှင့် ပတ်သက်၍ တရုတ်အစိုးရ အနေဖြင့် ကြားဝင် ညှိနှိုင်းပေးရန် ကချင် လွတ်မြောက်ရေး တပ်မတော် (KIA) က မကြာခင် ရက်ပိုင်းအတွင်းက တောင်းဆိုလိုက်သည်။



fighting-between-the-Myanmar-government-and-rebels

အစိုးရတပ်နှင့် KIA တပ် တိုက်ပွဲဖြစ်ပွားရာ နေရာပြမြေပုံ (ဓာတ်ပုံ - AP)
“(အစိုးရနဲ့ ကေအိုင်အေ) နှစ်ဦးတည်းပဲ ကျနော်တို့ လုပ်လာတာ ၁၆ နှစ်လောက်ရှိပြီ။ ဘာမှ အရာမရောက်ဘူး။ ဒီတကြိမ်မှာ ဆွေးနွေးပွဲတွေ ဖြစ်မယ်ဆိုပြီတော့ သူတို့ (တရုတ်) ကို သက်သေအနေနဲ့ပေါ့၊ သူတို့ရှေ့မှာ ပြောချင်တယ်လို့ ကျနော်တို့ အကြောင်း ကြာထားတယ်” ဟု KIA ဒုတိယ စစ်ဦးစီးချုပ် ဗိုလ်မှူးချုပ် ဂွမ်မော်က ဧရာဝတီသို့ ပြောသည်။

တရုတ်အစိုးရထံ ပေးပို့ထားသော စာနှင့်ပတ်သက်၍ တစုံတရာ အကြောင်းပြန်ခြင်း မရှိသေးကြောင်းလည်း ၎င်းက ဆိုသည်။

အစိုးရတပ်များနှင့် KIA သည် လအတန်ကြာ စစ်ရေး တင်းမာခဲ့ပြီးနောက် ဇွန် ၉ ရက်နေ့က စတင်၍ တိုက်ပွဲ ဖြစ်ပွားခဲ့ ခြင်းဖြစ်သည်။

အစိုးရက ကချင်ပြည်နယ် မိုးမောက်မြို့နယ် အတွင်းရှိ တာပိန် ရေအားလျှပ်စစ် စီမံကိန်းအနီးရှိ KIA တပ်များအား လုံခြုံရေးအရ စိတ်မချရသောကြောင့်ဟု အကြောင်းပြကာ ထွက်ခွာရန် ပြောဆိုခဲ့ကြောင်း သိရသည်။

ဗိုလ်မှူးချုပ် ဂွမ်မော်ကမူ “သူတို့ဘက်က ဒီဒေသတခုလုံးကို စိုးမိုးချင်တယ်။ ဒီနေရာက မိုးမောက်မြို့ကနေပြီးတော့ တရုတ်ပြည် နယ်စပ်ကို အတိုဆုံး နေရာဖြစ်တယ်လေ။ ကီလိုမီတာ ၃၀ လောက်ပဲ ရှိတာ။ အဲဒါကြောင့် ဒီနေရာကို သူတို့ လိုချင်တယ်။ အဲဒါ ကြောင့်ပဲ” ဟု ဆိုသည်။

နှစ်ဘက် စစ်ရေးတင်းမာနေပြီးနောက် KIA တပ်ဖွဲ့များအနီးတွင် အစိုးရဘက်က နယ်မြေခံ တပ်ရင်း ၆ ခု အပြင် တပ်မ ၃၃၊ ၆၆ နှင့် ၂၂ တို့မှ တပ်ရင်းတချို့ကိုလည်း တိုးချဲ့ချထားကြောင်း သိရသည်။

“ကျနော်တို့ အားလုံး အထက်က အမိန့်ပေးတဲ့အတိုင်း လုပ်နေပါတယ်။ ဘာပဲ ဖြစ်ဖြစ်လေ၊ ဖြေရှင်းတဲ့နည်းလမ်းကို လိုချင်တယ်။ ကျနော်တို့ တိုက်နေတာက ခုခံ ကာကွယ်တဲ့ အဆင့်ပဲ။ တပ်စုတွေနဲ့လည်း ညှိနေပြီ။ သိပ်ပြီး ကျယ်ပြန့်သွားတဲ့ အဖြစ်မျိုးတော့ မဖြစ်စေချင်ဘူး။ မတတ်နိုင်ရင်တော့ လုပ်ရမှာပဲ” ဟု ဗိုလ်မှူးချုပ် ဂွမ်မော်က ဆက်ပြောသည်။

ထို့အပြင် စစ်ပွဲ ဆက်လက်ဖြစ်မည်ကို စိုးရိမ်သော ကချင် စစ်ပြေးဒုက္ခသည် ၁၀၀၀၀ ကျော်သည် တရုတ်-မြန်မာ နယ်စပ်ရှိ KIA ဗဟိုဌာနချုပ် လိုင်ဇာမြို့နှင့် မိုင်ဂျာယန် ထိန်းချုပ်ဒေသများသို့ ထွက်ပြေးတိမ်းရှောင်နေကြသည်။

ကချင် လွတ်မြောက်ရေး အဖွဲ့ (KIO) မှ တွဲဖက် အတွင်းရေးမှူး ဦးလနန်က “လိုင်ဇာမြို့မှာသာမက မိုင်ဂျာယန် ဘက်ရော ဒုက္ခသည်တွေ အားလုံး ပေါင်းလိုက်ရင် စာရင်းဇယား အရ ၁၀၀၀၀ ကျော်သွားပြီ။ တချို့ တရုတ်ပြည်ဘက်ကိုလည်း ၀င်သွားတဲ့ လူတွေလည်း ရှိတယ်။ အဲဒီ အရေအတွက်ကတော့ စာရင်းလိုက်ကောက်ဖို့ဆိုရင် အချိန်နည်းနည်း ယူရဦးမယ်” ဟု ပြောသည်။

KIA ထိန်းချုပ်ဒေသနှင့် အလှမ်းဝေးသည့် ဒေသခံတချို့ မြစ်ကြီးနားမြို့ပေါ်ရှိ နီးစပ်ရာ ဆွေမျိုး၊ အသိမိတ်ဆွေများထံ သွားရောက် နေထိုင်ကြောင်း သိရသည်။

ဒုက္ခသည်များကို ဘုရားကျောင်း၊ စာသင်ကျောင်းတို့တွင် နေရာထိုင်ခင်းပေး၍ အစား အသောက်များ စီစဉ်ပေးထားကြောင်း၊ တိမ်းရှောင်လာသူများသည် လိုင်ဇာ-မြစ်ကြီးနား ကားလမ်းမကြီး တလျှောက်မှ ဒေသခံများ၊ မြစ်ကြီးနားမြို့ပေါ်ရှိ KIA ၏ မိသားစုများ ဖြစ်ကြကြောင်း သိရသည်။

“အစိုးရစစ်တပ်က မယုံသင်္ကာဖြစ်ပြီးတော့ ဖမ်းဆီးတာမျိုး၊ ရိုက်နှက်တာမျိုး လုပ်လာနိုင်တယ်။ အမျိုးမျိုးပေါ့။ အဲဒါကြောင့် သူတို့က စိုးရိမ်ကြပြီးတော့ ထွက်ပြေးလာကြတာပါ” ဟု ဦးလနန်က ပြောသည်။

KIA တပ်ဖွဲ့ဝင်များက အစိုးရတပ်၏ လမ်းပန်း ဆက်သွယ်ရေးလမ်းကြောင်းများကို ဖြတ်တောက်မှုနှင့် ပတ်သက်၍ ဒေသခံတချို့ကို အစိုးရတပ်က ဖမ်းဆီး စစ်ဆေးနေကြောင်း KIA က ဆိုသည်။

မြစ်ကြီးနားမြို့ ဒေသခံ အမျိုးသမီးတဦးက မြစ်ကြီးနားမြို့နှင့် ၆ ကီလိုမီတာ အကွာအဝေးတွင်ရှိသော စီတာပူနှင့် တပ်ကုန်း ဒေသများတွင် အစိုးရတပ်က ပေါ်တာဆွဲနေကြောင်း ကြားသိရသည်ဟု ပြောသည်။

အစိုးရတပ်များက လိုင်ဇာ-ဗန်းမော်-မြစ်ကြီးနား ကားလမ်း တလျှောက်တွင် တပ်အင်အား ထပ်မံ တိုးချဲ့ထားပြီး ခရီးသွားလာမှုကို ယခုရက်ပိုင်းအတွင်း တင်းကျပ်ထားကြောင်း သိရသည်။

ပြီးခဲ့သည့်နှစ် အောက်တိုဘာလက အစိုးရထိန်းချုပ်သော သတင်းစာများက KIA ကို “သောင်းကျန်းသူ” ဟု ပြန်လည်သုံးနှုန်းခဲ့ ပြီးနောက် ၁၉၉၄ ခုနှစ်တွင် သဘောတူထားခဲ့သော အစိုးရတပ်နှင့် KIA အကြား အပစ်အခတ် ရပ်စဲရေးလည်း ပျက်ပြယ်ခဲ့သည်။

No comments:

Post a Comment