Friday, April 6, 2012

မပြောင်းလဲဖို့လိုသော ရခိုင့်စိတ်ထား

မပြောင်းလဲဖို့လိုသော ရခိုင့်စိတ်ထား


ရခိုင်ပြည်အောင်လံတော်နန့်ရခိုင်အမျိုးသားဝတ်စုံ ပြောင်းလဲဖို့ဇွတ်အတင်း ပြုလုပ်နိန်ခြင်းသည် ရခိုင်လူမျိုးရို့၏ အမျိုးသားစိတ်ဓါတ်နန့် ယဉ်ကျေးမှုတိကို နိုင်ငံရေးသဖောအရ ဖျက်ဆီးလိုက်ခြင်းဖြစ်သည်။ ရခိုင်အောင်လံတော် ပြောင်းလှဲလိုက်သောအားဖြင့် ရခိုင်လူမျိုးတိရဲ့ ကံကြမ္မာကို ဖျက်စီးလိုက်ခြင်းသို့ ရည်ရွယ်ပြုလုပ်ခြင်းဖြစ်ပြီး၊ အမျိုးသား ရိုးရာဝတ်စားဆင်ယင်မှုကို ပြောင်းလှဲလိုက်သောအားဖြင့် မျိုးချစ်စိတ် ဓါတ်ဖျက်ဆီးလိုက်ခြင်းသို့ ရည်ရွယ်ပြီး ပြုလုပ်ဆောင်ရွတ်ခြင်းဖြစ်သည်။ ရခိုင်အောင်လံနန့် အမျိုးသားဝတ်စား ဆင်ယင်မှုတိကို ပြောင်းလဲလိုက်သောအားဖြင့် ရခိုင်ပြည်သူများသည် ကံကြမ္မာမဲ့ရာနန့်အတူ မျိုးချစ်စိတ်ဓါတ်လည်း ယိုယွင်းပျက်စီးပြီး အုပ်ချုပ်ခံဘဝနန့် အဆုံးသတ်လူမျိုးတုန်း ဘဝသို့ဦးတည်စီပြီး၊ အာဏာစွမ်းအားနန့် အရာရာတိုင်းကို စိတ်တိုင်းကျ လုပ်ကြံဖန်တီးနိုင်သော အုပ်ချုပ်သူများက စီမံကွတ်ကဲ ဦးစီးလုပ်ဆောင်နိန်ခြင်းဖြစ်သည်။ ရခိုင်ပြည်သူများ တွေးကြည့်ကေ သိနိုင်ကြသည်မှာ ရခိုင်ပြည်တွင် အရေးကြီးသော ရခိုင်ပြည်သူများအတွက်  ဆောင်ရွတ်စရာတိကို အကောင်အထည်မဖေါ်ဘဲနန့် အရေးမကြီးသော ရခိုင်အောင်လံတော်နန့် ရခိုင်အမျိုးးသားဝတ်စုံပြောင်းဖို့အတွက် ပြည်သူတိကို တင်ပြဆွေးနွေးဖော်ထုတ်မှုမဟိန့်ဘဲ ဇွတ်အတင်းဇာအတွက်ကြောင့် လုပ်နိန်ရသလဲပါဟူသည်ပင်ဖြစ်သည်။ သို့သော်ငြားလည်း  အုပ်ချုပ်သူရို့တိ၏ အကွတ်ကျကျလုပ်လုပ်ဆောင်ရွတ်ချက် လွဲကျလားခြင်းသည် ရခိုင်တိုင်းသူပြည်သားများ၏ ပိုင်ဆိုင်ထားသော ကံကြမ္မာကောင်းကြောင့်လို့ ပြောရပေမည်။ အုပ်ချုပ်သူရို့တိရဲ့ ရခိုင်အောင်လံတော်နန့် ရခိုင်အမျိုးသားဝတ်စုံပြောင်းလဲပြီးစီးနောက် လုပ်ဆောင်ချက်သည် ရခိုင်ပြည်လွတ်မြောက်ရေးပါတီနန့် ငြိမ်းချမ်းရေး လက်မှက်မထိုးခင်၊ ရခိုင်ပြည်မဟာမြတ်မုနိဘုရားမှာ ရွှေထီးတော်မတင်ခင် အားလုံးပြီးစီးရမည်ဖြစ်သည်။ သို့သော် သူရို့တိ၏ ရည်ရွယ်ချက်သည် မအောင်မြင်လိုက်ပါ။ ရခိုင်ပြည်ကို စောင့်သျှောက်သောနတ်မင်းကြီးများ ကယ်တင်လို့ ပြောဆိုထိုက်မည်။ ရခိုင်ပြည်လွတ်မြောက်ရေးပါတီနန့် လက်မှက်ထိုးမှာကြည့်လိုက်ပါ။ လက်မှက်ထိုးပြီးနောက် ၄ လပိုင်း ၆ရက်နိန့်မှ အကျုံးဝင်မည်ဟုသိရသည်မှာ၊ ၆ရက်နိန့်မှာ ဘုရားမှာထီးတင်မည် ဖြစ်သည့်အတွက်ကြောင့် ဘုရားလည်းထီးမိုး ရခိုင်ပြည်လွတ်မြောက်ရေးပါတီလည်း ငြိမ်းချမ်းလုပ်ဆိုရေ အယူနန့် လုပ်သောလုပ်ကွတ်တိဖြစ်သည်။  နောက်တစ်ခုက ပြည်တွင်းပြည်ပမှာ လှုပ်ရှားနိန်ကတ်သော ရခိုင်ပြည် ကျော်ဖြူမှထွက်သော သဘာဝဓါတ်ငွေ့နန့် ပတ်သက်လို့လှုပ်ရှားမှုတိရပ်တန့်ပြီး ရခိုင်အောင်လံတော်နန့် ရအမျိုးသားဝတ်စုံ ပြောင်းလဲဖျက်စီးရေး ကိစ္စသို့ ရခိုင်လူမျိုးများ၏ စိတ်အာရုံကို နိုင်ငံရေးစကားကွတ် အရပြောင်းလွဲလိုက်ဖြင်းဖြစ်သည်ဟုလည်း ယူဆနိုင်ပါသည်။ တစ်ချက်ခွတ်လိုက်စွာနန့် နှစ်ချက်ပြတ်လိုက် ခြင်းဖြစ်သည်။
ရခိုင်အောင်လံတော်နန့် ရခိုင်အမျိုးသား ဝတ်စုံဟူသည် ပါတီအဖွဲ့အစီးတိက စိတ်တိုင်းကျ ဖန်တီးလို့ ရသည်ကောမဟုတ်ပါ။ ရခိုင်ပြည်သူပြည်သားများသို့ တင်ပြထုတ်ဖော်ဆွေးနွေးပြီး ရခိုင်ပြည်သူများလက်ခံမှသာလျှင် ပြုလုပ်သင့်သည်။ ညကမှ ပေါ်လာသော ပါတီချေ တစ်ခုက ရခိုင်ပြည်သူပြည်သားများ လက်ခံကျင့်သုံးလာခသည်မှာ နှစ်ပေါင်းလေးဆယ်ကျော်ကြာလာပြီဖြစ်သော အောင်လံတော်နန့် အမျိုးသားဝတ်စားဆင်ယင်မှုတိကို ပြောင်းလှဲဖို့ ဇွတ်အတင်းကြိုးစားနိန်စွာကို စိဉ်းစားကေ သိနိုင်ပါပေသည်။ ကြံ့ဖွံ့ပါတီနန့် ရခိုင်အောင်လံတော်၊ ရခိုင်အမျိုးသား ဝတ်စားဆင်ယင်မှုနန့် အဇာတစ်ခုမှ လည်းပတ်သတ်ဖို့ အကြောင်းလည်းမဟိန့်ပါ။ ကြံဖွံ့ပါတီရဲ့ ပင်မဗဟိုဌာနချုပ်သည် ရခိုင်ပြည်တွင် မဟိန့်သောကြောင့် ရခိုင်ပြည်တွင်ဟိန့်သော ရခိုင်လူမျိုးကြံ့ဖွံ့ပါတီဝင်များသည်လည်း ရခိုင်အမျိုးသားကိုယ်စားပြုမဟုတ်သည့် အတွက်ကြောင့် ရခိုင်အောင်လံတော်နန့် ရခိုင်အမျိုးသား ရိုးရာဝတ်စုံသည် အဇာမှလည်း မသက်ဆိုင်ပါ။ ရခိုင်အောင်လံတော်၊ ရခိုင်အမျိုးသားဝတ်စား ဆင်ယင်မှုသည် ရခိုင်ပြည်သူထုကိုယ်စားပြုသော ရခိုင်အဖွဲ့အစီး၊ ရခိုင်ပြည်သူပြည်သားများနန့်သာ သက်ဆိုင်သည်။ ထိုသို့ ဇွတ်အတင်းပြုပြင်ပြောင်းလဲနိန်ခြင်းသည် ဒီမိုကရေစီလို့ ပြောဗနာ အာဏာရှင်စနစ်ကို ဆက်လက်ကျင့်သုံးနိန်ခြင်းဖြစ်သည်။ ဒီမိုကရေစီ၏ အနှစ်သာရသည် ပြည်သူများက အုပ်ချုပ်သော ပြည်သူစိတ်တိုင်းကျပြည့်သူ့ အကျိုးတော်ဆောင်သာဖြစ်ရပေမည်။ အဂုနိန်အထား အုပ်ချုပ်မှုစနစ်သည် ကြံ့ဖွံ့ပါတီ၏ စိတ်တိုင်းကျလုပ်ဆောင်ချက်များကို ရခိုင်ပြည်သူပြည်သားများက လိုက်နာရမည် ဖြစ်နိန်သည်။ လွတ်တော်အတွင်း မဲခွဲဆုံးဖြတ်တိုင်းကို ရခိုင်တိုးတက်ရေးပါတီက ယှုံးဖို့စွာက သေချာပြီးသားပါ။ စစ်တပ်နန့် ကြံ့ဖွံ့ပါတီပေါင်းလိုက်ကေ နိုင်ဖို့အကြောင်းက မဟိန့်နိုင်ပါ။ ရခိုင်အောင်လံတော်နန့် ရခိုင်အမျိုးသားရိုးရာ ဝတ်စုံကို ခေတ်နန့်လိုက်လျှောညီထွေစွာ ပြောင်းရမည်ဆိုသည့် အကြောင်းပြချက်မှာမူ အလွန်တရာ ရယ်ဖွယ်ရာပင် ဖြစ်သည်။  ထို့ကြောင့် ရခိုင်အမျိုးသားယဉ်ကျေးမှုနန့် ရခိုင်အမျိုးသားစည်းလုံးညီညွတ်မှုတိကို ဖျက်ဆီးနိန်သည့် အုပ်ချုပ်သူများ၏ လုပ်ရပ်များကို ကမ္ဘာ့ကုလသမ္မဂဆိုင်ရာအဖွဲ့အစီးကြီးများသို့၊ အမေရိကန်အစိုးရ အဖွဲ့အစီးသို့ ပြည်ပရောက် ရခိုင်နိုင်ငံရေးဂေါင်းဆောင်များနန့်၊ ပြည်တွင်းနိုင်ငံရေး ဂေါင်းဆောင်များကပါ တင်ပြသင့်ပါသည်။ ရခိုင်အောင်လံတော်နန့် ရခိုင်အမျိုးသားဝတ်စုံကို ရခိုင်မျိုးချစ်စိတ်နန့် အတူကာကွယ်စောင့်သျှောက်နိုင်ရမည်။ ရခိုင်အောင်လံတော်နန့် ရခိုင်ရိုးရာဝတ်စုံကို မကာကွယ်မစောင့်နိုင်မည်က အနာဂတ်ရခိုင်ပြည်နန့် ရခိုင်လူမျိုးအတွက် ကာကွယ်ထိန်းသိမ်းစောင့်သျှောက်နိုင်ဖိ်ု့အတွက် အာမခံချက်မဟိန့်နိုင်ပါ။ ကြံ့ဖွံ့ပါတီက အာဏာဖိအားနန့် ပြောင်းခိုင်းသည်လည်း ရခိုင်သူရခိုင်သားတိက မပြောင်းဖို့လိုသည်။ ရိုးရာအဝတ်အစား ဝတ်စားဆင်ယင်လို့ ဥပဒေအရ အရေးယူလို့မရပါ။ ရခိုင်အောင်လံတော်ကိုလည်း ပြည်သူလက်မခံဘဲနန့် အာဏာဖိအားနန့် လုပ်ယူလို့မရပါ။ ထိုသို့အာဏာဟိန့်လို့ အားနန့်လုပ်လားဟိန့်သော်လည်း ထိုအလံနန့် အဝတ်အစားသည် ကြံ့ဖွံ့ပါတီ၏ အလံနန့် အဝတ်အစားသာ ဖြစ်ပါလိမ့်မည်။ အကျွန်ရို့ ရခိုင်သူရခိုင်သားတိက လုံးဝလက်မခံဖို့လိုသည်။
အုပ်ချုပ်သူများ၏ နိုင်ငံရေးကစားကွတ်သည် အလွန်တရာပိရိလှသည့်အတွက် အကျွန်ရို့ရခိုင်ပြည်သူပြည်သား အနိန်ဖြင့် အမျိုးသားရေးတာဝန်အသိစိတ်ကို မျိုးချစ်စိတ်ဓါတ်ခိုင်မာစွာဖြင့် ရခိုင်လူမျိုးများ အမျိုသားကာကွယ်စောင့်သျှောက်ရေးနန့် အမျိုးသားအကျိုးစီးပွားတိုးတက်ရေးအတွက် အားသွန်ခွန်စိုက်ဖို့ လိုသည်။ ဂေါင်းဆောင်ကသာ တိုင်းပြည်အကျိုး၊ အမျိုးသားအကျိုးကို လုပ်ပီးစွာမဟုတ်ပါ။ ဂေါင်းဆောင်က လမ်းပြသာဖြစ်ပြီး ပြည်သြူပည်သားက တိုင်းပြည်ရဲ့ အကျိုးတာဝန်ကိုထမ်းဆောင်ရခြင်းဖြစ်သည်။ တိုင်းပြည်ကို ကာကွယ်ထန်းသိမ်းစောင့်သျှောက်ဖို့နန့် တိုင်းပြည် အကျိုးစီးပွားတိုးတက်ဖို့အတွက် ပြည်သူများ၏ စိတ်သဖောထား၊ ထိန်းသိမ်းနိုင်သည့် ကိုယ့်ကျင့်တရားများသည် အလွန်တရာအရေးကြီးလှသည်။ လူတစ်ဥူးတစ်ယောက်၏ စိတ်သဖောထားကောင်းမွန်မှ၊ ကိုယ့်ကျင့်တရားကို ထိန်းသိမ်းနိုင်မှ မျိုးချစ်စိတ်ဓါတ်စုစီးနိုင်ပြီး အမျိုးသားယဉ်းကျေးမှုကို ကာကွယ်ပြီး အမျိုးသားအကျိုးစီးပွားကိုလည်း တိုးပွားနိုင်သည်။ အမေရိကန်မှာ အိမ်တိုင်းမှာ အမေရိကန်အလံတော်ကို အမြတ်တနိုးနန့် အိမ်တွင်းနံရံမှာ ချိတ်ဆွဲထားသည်ကို တွိရသည်။ မလေးသျှားတွင်လည်း အိမ်တိုင်းမှာ မလေးသျှားအလံတော်ကို အမြတ်တနိုး နန့် တန်ဖိုးထားစွာကို တွိရသည်။ အလံတော်ကို မြင်တိုင်း တိုင်းပြည်နန့် လူမျိုးအပေါ် စောင့်ထိန်းသိမ်းသည့်စိတ်များ၊ ယဉ်ကျေးမှုကို ကာကွယ်စောင့်ရှောက်မည် စိတ်များတန်ဖိုးဟိန့်စွာနန့် ဖြစ်ပေါ်ခြင်းသည် တိုင်းပြည်တစ်ပြည်၊ နိုင်ငံတစ်နိုင်ငံ၏ အမျိုးသားရေး အမြဲတမ်းရှင်သန်နိုးကြားမှုကိုဖြစ်ပေါ် စီပြီး၊ တိုင်းပြည်နန့် လူမျိုးအတွက် ကာကွယ်ထိန်းသိမ်း စောင့်သျှောက်နိုင်သည့် ခိုင်မာသော တိုင်းသူပြည်သား တစ်ဥူးတစ်ယောက်စီ၏ မျိုးချစ်စိတ်စုစည်းမှုအားကို ဖြစ်ပေါ်စီသည်။ ထိုမျိုးချစ်စိတ်စုစည်းမှုအားကို ဇာအရာမှ တိုက်ခိုက်လို့မရနိုင်ပါ။ ထို့်အတွက် အကျွန်ရို့ ရခိုင်သူရခိုင်သားများသည် ဗုဒ္ဓဘာသာအပေါ်မှာ အခြီခံထားသည့် လူမျိုးဖြစ်သည့်အတွက် ပြည်တွင်းပြည်ပ ရခိုင်နိုင်ငံရေး ဂေါင်းဆောင်များ၊ တော်လှန်ရေးဂေါင်းဆောင်များနန့် ရခိုင်သူရခိုင်သားအနိန်ဖြင့် ဘုရားရှိခိုးသီလဆောက်တည်ပြီး ရခိုင်အောင်လံတော်ကို ဆီမီးနန့် ပူဇော်ထိုက်ပေသည်။ သို့မှသာ ရခိုင်သူရခိုင်သားများ၏ မျိုးချစ်စိတ်ဓါတ် စုစည်းမှုအားသည် ရခိုင်အောင်လံတော်မှာ စုစည်းမှုဖြစ်ပေါ်ပြီး ရခိုင့်အောင်လံတော်မှ မမြင်နိုင်ရေစွမ်းအားတိ ထွက်ပေါ်ပါလာလိမ့်မည်ဖြစ်သည်။ထိုသို့လုပ်ဆောင်ခြင်းသည် နိုင်ငံရေးသဖောအရ နိုင်ငံရေးစိတ်ဓါတ်မြှင့်ပီးခြင်း၊ စုစီးပီးခြင်းလည်း ဖြစ်သည်။ ရခိုင်အောင်လံတော်၏ အနက်အဓိပ္ပါယ်ဖွင့်ဆိုချက်ကို ဖတ်ကြည့်က သိနိုင်ပါသည်။ ထိုမှသာ ကမ္ဘာပေါ်တွင်ရှားပါးသော ဝေသာလီခေတ်ကြီးပိုင် ပြန်လည် အီးချမ်းသာယာသော၊ ဆန်ရီစပါးများပြားကွယ်ဝသော တိုင်းပြည်ကြီးပေါ်လာမည်ဖြစ်သည်။

သာဂီဝင်

No comments:

Post a Comment